四天三夜西貢港島獨木舟​ (二) 東龍島 > 石澳

相關遊記: 四天三夜西貢港島獨木舟

到達東龍,算係了左一個心結,第二日旅程無論去到邊都係歷史性既一步了~ 結果,捨蒲台、棄橫瀾,輕描淡寫的越過藍塘海峽,同貨輪玩左一場遊戲,順利到達石澳。



經過一晚既煎熬,又鼻鼾又行雷咁,結果都瞓到覺都算係咁,本來校左鬧鐘7:30起身,大家都漠視時間,一路瞓到9半。

我叫dino大大起身,佢同我講: [其實我7半已經可以起身ga la],你好野。

拿拿臨pack野又落南圍士多食個靚麵,個營同埋啲唔等駛野就留響營地,輕裝上陣,呢個時候仍然十分想去一登蒲台,加上dino尋晚發現,橫瀾島先係今次旅程既亮點,咁又係wr,蒲台都有船去,橫瀾就真係今日一別,後會唔知幾時有期,二人雙望一笑,各自響掌心寫上「橫瀾」二字,就決定向橫瀾出發。

好! 就咁決定,不過為左安全起見,就上網check check風向同風勢吧 – 東南,二至三級風。

尋晚假日士多伯伯話吹東南風千祈唔好去,再望下石灘,尋日完全平靜既岸邊,居然出現白頭浪,咁唯有又保守一d,決定先綑東龍既北至西,貪呢一段可以用返東龍黎擋風,睇清楚風勢,咁既走向,亦即係會先一登港島再說! (假日士多伯伯同婆婆近年已經過身了,多謝當年嘅窩心提示,RIP…)



落水,一野就向公眾碼頭方向出動

過左碼頭,到左啲漁排,有三四隻狗仔離遠狂吠歡迎,Dino大少由於力太多,仲可以同佢地玩潑水遊戲,而小弟呢,可能由於尋日果十幾公里加上瞓得麻麻,對手好軟,好似好唔想撐咁,希望撐多陣會好轉。

離開東龍水域,面前既就係將軍澳同港島了,響去港島之前,先要橫越藍塘海峽,老實講呢個真係挑戰黎ga,第一次去到呢d有大船既海峽,又冇得避,硬食要穿越,結果比隻大船呠左一野,我同dino就指住貨輪船尾順便欣賞佢緩慢駛過。

呢段兩K唔夠既藍塘段玩左我地好耐,望住大浪灣,不過撐極都未到,港島呀,就黎掂到你喇。

石澳多野食多野玩,決定強勢登陸。響防鯊網外搵左一陣位突入,發現原來成個灘都封哂,未試過咁登陸wr。



望返轉頭,原來有個位係開左比獨木入去ga,不過我地就用左土法硬闖,真係特別型。

登陸之後,我興奮踏足港島都未feel到,已經feel到自己極頹,同尋日越去越有完全唔同,應該真係recover唔到,我心底裡面,最擔心既就係,dino哥硬入蒲台,咁我呢次真係捨命陪君子了。

一上岸發現weekday都唔係講笑,勁多人響度游水曬太陽,係喎仲仲係暑假。

睇完野就去沖個淡水涼先,做第二日水上人已經對淡水產生左好大既心理需要,見淡水就用,再搵間餐廳食個靚lunch。

坐底,又開始plan下下半晝咩環境,dino大少強烈要求去唔到橫瀾都要上蒲台頂一頂癮,但呢個時間仲去蒲台理應有去無歸,起碼單日一定回不了東龍,即係話,一定要瞓街(D營響哂東龍),都唔緊要,不過真係好驚佢冇鋪頭開,冇補給就真正開心。



諗左一輪,見dino大少既堅執,響有帶拖艇繩既情況下另一位參與者屈服,決定征蒲台!!

響一秒之後,android電話終於load到最update既天氣,喂喂又有雷暴,成功打倒一秒前既我地,決定今日係咁先,求其回程。

食完貴麵,響石澳同圍行下就閃,聽到有人話隔離百佳等,不過搵黎搵去都唔見,想涼下冷氣都唔得。其間又見到d好靚既屋仔同攪笑迷你golf場

響靚位出防鯊網,完成左港島target感覺良好,亦令我發現dino大少真係唔係流料,呢條友應該真係可以單日40k,此刻嘅我,確信佢同自己一樣強。

面對大頭洲

又有大船喇~穿越藍塘海峽,回程仲多有貨輪,今次果d仲要係滿貨既tim,好驚佢capsize。原來佢地都好似過車咁一板板咁由拖艇拖,好癲,不過真係好慢,慢到想呠返佢!!



呢一段由東龍南面向東北上,由過藍塘開始已經不斷受大浪挑機,唔係好誇果種,不過回程5km都係咁真係消耗體力,老友不斷話攰,我就不斷爆追,真係要好好操練出年先好同你再玩獨木舟。

不斷撐舟終於過咀,始終都好似撐極都未到咁,完全估唔到,第二日就撻皮度咁高,真係要諗諗計。

好似話咁快就到,其實由石澳返到東龍已經又個半鐘既事,返到沙灘竟然4點幾。

今日almost吉艇上陣,unload果下唔錯,飛快就完成,一野上埋南圍士多hea + drink。已經懶到將d槳、救生衣全部hea響南圍,人就沖個靚涼,又享受人生了。

是日已經完全放棄左野趣,直接依賴阿王生存,靠佢貯物、飲食、乘涼、驅蚊、叉電、吹水。



到左第二日,終於得閒同南圍士多影下相

夜晚,阿王整左個最強豬扒飯比我地食,一來我地好似好耐冇食飯咁,好想食飯,二來佢個秘製醬料同個扒都好正,下次再臨東龍必食!另外阿王好吹得,係我地兩個無所事事先可以同佢吹咁耐,由佢招呼過outward-bound,到佢個相熟既導師移民美國,成晚真係完全唔停。

阿王係個純樸嘅老實既人,而且招呼好好,好肯幫手,呢兩日真係多謝哂~

HEA到9點,聽到佢話要睇紫禁驚雷結局,dino哥駛出暗示技想入屋一齊睇,由於電視響屋入面,正路應該唔方便內進,so阿王都冇理佢。

返左營地,冇野做不如周圍行下

行行下行左上燈塔,呢個位好好風ar,可唔可以響度瞓。

既然冇得紫禁驚雷,咁就回營等瞓好了,返到去,hea下,冇野做,myTV唔知做咩Load唔到。

只好睇港台頭條新聞。



今晚冇咁熱,有風,即係聽日又好好風~~ 今晚瞓得好好,唔夠一點就瞓得著~~

2011年8月26日

是日路線:

相關遊記: 四天三夜西貢港島獨木舟

發表迴響

你的電子郵件位址並不會被公開。 必要欄位標記為 *


請讚好【野遊物報】專頁!