輕鬆行石澗‧屯門老虎坑

夏日炎炎到極點,受到呼喚話要行山,無論如何軟硬兼施半推半就咁就屈咁唔行澗嘅朋友陪同行澗, 仲要係自己主場屯門行,高度自我中心玩法。

自信滿滿帶路兜咗好耐先離開到富泰,中間入咗農場再行錯幾多已唔想再提,只要表現得充滿信心,隊友就算唔睇得出都唔會表現出黎。



見到石礦場心都定啲,前行就係水塘。全程不停講鯉魚精傳說大家都聽得津津有味。

藍地灌溉水塘喺屯門嚟講都算鼎鼎大名,喺度駐足影相嘅行友都唔少,我地影影下都玩咗半粒鐘,係時候起步行澗喇。

沿靚仔山路一直行去到塘尾,再行多十鬆分鐘基本上隨時可以入澗。




進入老虎坑澗途,其實都係一條闊大易行,少量攀爬嘅好澗,美中不足係沙澗特質,水唔會清得去邊而且成日入鞋,不過行得新界西諸澗都預咗。

爬過幾舊大石之後已經到咗全澗唯一可以浸下嘅行者池,當然亦有啲行友喺度玩緊,見到小朋友都游得咁開心,雖然水質麻麻都一於浸下腳。



走人最直接係出澗行返山路原路回程,不過要滿足大家想行山嘅心情,一於兜大圈,原來真係遠左好多,好似無盡上坡咁,終於去到九徑天梯前,可惜已經5點幾,唔想夜行都係向屯門方向走人。

一場入到老屯,點可以唔一行著名嘅bad land, 有靚路唔行行爛路,除咗係挑戰自己,亦都同唔睇清楚地圖有關。

有靚路唔行,揀錯左直接不過好爛嘅山路。

攪咗好耐,終於都喺日落前脫出,落返何福堂揾地方食Tea散場。



發表迴響

你的電子郵件位址並不會被公開。 必要欄位標記為 *


請讚好【野遊物報】專頁!